Zetaren Bideetako Musika Hariak
Musika kolaborazioak eta etnomusikologia uztartzen dituen proiektua, album, ikuskizun, bideoklip eta film labur gisa hedatua.
Istorioa
Hastapenean, hi haiz, Oud-a, Bahraingo uhartean eman nituen bortz urteetako hari nagusia. Lotura sendo, intimo eta sakratua sortu genuen han berean, eta lokarri horri omenaldia egin nahi izan diot bidaia baten bidez, bilaketa baten bidez, gure historiaren harian: harizko musika-tresnak diren hire kusien xerka joatea.
Gaia hik duk hautatu, helmuga nik hautatu diat: zetaren bideak. Pentsamenduen, trebetasunen, hizkuntzen arteko nahasketa... Harizko musika-tresnen eta hortik sortzen diren musika tradizioen goraldia. Lurralde ezinago zabal honetan, labirinto honetan, ez gara sekula galdu, hi izan baihaiz beti ene Arianeren haria.
Urte batez aritu gara disko honetan parte hartu duten 40 musikariekin aztertzen, hizketatzen, partekatzen eta musika sortzen. Hi, Oud, eta hire kusiak diren harizko musika-tresnak hari sentikorrak zarete, so egiten dugun inguramena poesiaz dardaratzen duzuenak. Gure egiazko izaeraren harmonia baketsua atzemateko, gure bihotza lantzen duten hariak zarete.
Hari ezin ikusizkoak, gizadia tolerantzia, bake eta maitasun izpirituan biltzen duten esperantza unibertsaleko notak.
Topaketa musikalak
Ezezagunera eginako jauzi bat, filmatzeko kamararekin, grabatzeko mikrofonoekin eta ene Oud lagunarekin.
"Lurralde ezezagun haietara iristean, kontaktuen falta sumatzen nuen. Musika eskolen ateak jotzean, museoetara, jaialdietara hurbiltzean, edo biztanleei galdetzean, musika topaketak horrela sortu ditut. Musikarekiko pasio partekatu bati esker... eta zorte pixka bat ere!"
Topaketa horiek guztiak musika klipen bidez hartu dituzte, eta "When Oud meets" izenburupean emango dituzte 2023-2024 denboraldian zehar.
1
Kunming, Txina / Guzheng
2
Kunming, Txina / Pipa
3
Yangon, Myanmar / Saung
4
Varanasi, India / Sarod
5
Almaty, Kazakhstan / Qobyz
6
Tashkent, Uzbekistan / Rabab
7
Ashgabat, Turkmenistan / Guitar
8
Isfahan, Iran / Tar
Elkarrizketak
Musika tradizional horiek gaur egungo munduan duten lekuari buruz egindako laburmetraiak hemen aurkezten ditut.
Txinatik hasi eta Istanbul arte, atseginez elkarrizketatu dut musikari eta etnomusikologoekin. Musika tradizioen kontserbazioa, musika modalaren teoria eta bere sorkuntza transkulturala... hainbat gaia interesgarri deskubritzeko!
Elkarrizketa horiek 2023-2024 denboraldian plazaratuak izanen dira laburmetrai gisa.
Paisaiak
Jatorriz, lurralde horiek osatzen gaituzte gizakiok, musika sortzeko eta mundua pentsatzeko dugun moduan.
Nire Oud-aren hariekin lurralde hauei omenaldi bat egiten diet.
